إلى أبي العزيز ... بقلم / صابر فرج ياسين

 

إلى أبي العزيز

......

والدي العزيز

حبيبي والسندْ والضهر

أنا سفينة وهو البحر

باسمه .. انشبك اسمي

ورضاه عني بدعوة فجر

وشفت الحب ف عيونه

ورعايته ف برّد و حرّ

ووجعه لما بتألم وسهرهُ

يبكي لمّا يزول الشر

وياما نسيت كتير حقه

وأنا حقي ده أول أمر

ده أبويا وصديق عمري

وعشقي لحد أخر العمر

حبيبي وبسأله بجهلي

يجاوبني على مهلي

يقولّي يا قمر عُمري

دا قمر ف السما عالي

ودي شمس .. راح تدّفي البحر

علمني بحُبه حاجات

قرآن وياّ نحو وجبر

ولحيرتي بلاقي جواب

ومعاه شيلت كل السر

يقولّي خاف على روحك

أموت .. لو حصلك شر

وأخاف ازاي وده عمري

حبيبي والسند والضهر

وكلامه قانون مفروض

وكلامه .. احلي صيغة أمر

أبويا اللي انا عاشقه

ونوره زى نور الفجر

و علمني اصلي ازاي

يا ولدي أوعى تنسى الفجر

*******

يا بويا ياللّي ما لك زيّ

صانك ربنا لينا ويصونك..

في عُمرنا اللّي جاّي

إلي والدي العزيز

بحبك يا قدوتي وعزي

ياسندي وأنت للعيون الضّي

ورافع ف السما راسي

بسيرتك اللي مالها زيّ

بيك أنا اتفرد ضهري

يديمك ربنا لينا

و نورك في عيونّا حيّ

بقلم / صابر فرج ياسين