فضفضه مع النفس
==========
عونى هشام
ياللا نفضفض ياللا نقول
بقلم واعى وفكر عقول
نشغل مصنع. نحمى وندفع
اى جبان خاين مخبول
اصل كلامى. بعضه اغانى
تشد الهمه نصول ونجول
عايزين دعوه تصحى ضميرنا
بقاله زمان نايم وكسول
نكتب قصه وفيها حكايه
عن ابطال ما تخاف م القول
عن عالم عندنا فى الذره
عن مطعم بيقدم فول
عن سواق فى طريقه معاكس
عن بلطجى. دايما مخبول
نفسى قانون وتكون ايده طايله
مايبقاش زهر بايد مسئول
يبقى تملى شاهر سيفه
ناصر الحق ومش مشلول
اهدى شويه وادينى عقلك
ياتاخد عقلى انت وتقول
لو فى كلامى حاجه شخصيه
سيبك منى. وقوم على طول
انا مش شاعر اقول اغنيه
هاتسمع منى كلام معسول
ولا اكون مره ليك وعليك
ولا من طبعى اعيش دلدول
انا مش رجعى عايش عصرى
طفت بلادى عرض وطول
شفت كتير من ناس شقيانه
وناس بتهبش زى الغول
قلت افضفض يمكن افهم
هو انا. فاعل او مفعول
اصل ان قلت. مابعرف اخبى
وحرفى بخطى مش منقول
نخلى تاريخنا. جوه عنينا
يكون مفتاح. لطريق مقفول
شوفوا اجدادنا سابت ايه لينا
واحنا بنجدل فى المجدول
كل الناس بعدينا سبقونا
اللوم على مين دول او دول
حد يقول لى تاهت افكارى
هى الخطوه لورا على طول
اصل معايا نظاره قديمه
شايفه تاريخها. سابق دول
انا طولت صحيح بزياده
واسف لو وقتك مشغول
اصل الدنيا. صبحت غابه
وشفت ميزانها. مش معدول
نفسى اشوف من بكرا اجابه
تعلم ابنى صحيح القول
يقول الحق ما يخشى ديابه
ورافع راسه مش مزلول
اهى فضفضه. بتريح نفسى
وارص بحرفى خيوط النول
===============
ليست هناك تعليقات:
إرسال تعليق