تعددت الأسبابُ والرقصُ واحدٌ
صاجات
========
قَفَلوا القهاوى ..
فَتَحِت الوِحدَه .
الفكر نازل رقص ع الواحده
الدنيا صاله ..
رخيصه مش بنوار
رقَّاصه ترسو ..
ومَزَّه للزوار
السكرانين من رعبهم م الموت
ماعادشى .. ناقص عِلم .. ولا هلفوت
هذا أوان السبحه والقديس
والقفل على خطايانا بالترابيس
الكل للأخلاق وكيل حصرى
وكل من يغلط ماهوش مصرى
الأنبيا دلوقتى 100 مليون
وأنبيا فى خطوط على التليفون
وأنبيا تصاحبك منين ما تكون
من قبل جلدك يلزقوا ف روحك
تعرف أصول اللمس ف جروحك
مدد يا أنبيّا افتراضيين
يسلم ( كيبورد ) الحكمه يا عارفين
الطاعة ليكوا .. وإحنا لينا السَمع
الكلمة .. لازم تبقى كلمة جَمع
والجَمع .. لا .. مُذكَّر .. ولا .. سالم !!
لمّا اتجمع عالِم .. بقوا .. عوالِم !!
وفضيله حَلَفِت ع الصاجات فى البوست
يحرم عليها معاها هز الوسط !!
تحرم ياهَز ف نكبة الأمَّه !!
وبعوده لمَّا تنجلى الغُمَّه !!
والخَلق ترمي السبحه والقفاطين !!
ترجع تصلّى الجمعه فى الفتارين !
ويسبَّحوا للواحد الأشهر !!
الدنيا خضره معاه عشان أخضر !!
قادر بجاهُه يقفل الأزهر !!
والدنيا تمشى الفجر ب تغنى !!
تقلع همومها عند 100 يَنًى !!
وتصلّى بينا .. وهيَّا عريانه !!
نخسر .. وتفضل هيَّا كسبانه !!
الخلق نفس الخلق .. مجنونه
الصفحه واحده .. وبرضو ملعونه
نفس الإيمان من قَرن فى ( الكوليرا )
طالع من التلًاجه ف ( كورونا )
والخوف يكفِّى م الحبايب ألف
ب وش مؤمن كُفرُه بان ف الخلف
أصل الركوع دلوقتى سبّوبَه
وال ( sale ) أوانُه كل غيبوبه
قبل امّا يرجع ابوها عند أخوك
ويضحّكك نفس اللى ب يبكوك
تفتح قهاوى وتقفل الوِحده
القلب ينزل رقص ع الوَحدَه
والدنيا تتحوَّل يادوب بنوار
إفرح ب ( شَيكِل ) ..
وانسجَم ب ( دولار )
________________________
كيبورد .. لوحة مفاتيح الكتابه
الأخضر .. هو إسم الشهره للدولار الأمريكى
الكوليرا .. وباء اجتاح العالم منذ نحو قرن كما إجتاحه كرونا الآن
ال sale .. الأوكازيون
الشيكل .. عملة الكيان الصهيونى
ليست هناك تعليقات:
إرسال تعليق