يا صبر فين اراضيك
محتاجه تسمعني
شاور بطرف عينيك
إن كنت سامعني
أنا قلبي راكع ليك
من كتر اوجاعي
عشمان وإيه يرضيك
وأنت الدوا بتاعي
يمكن بطعم المر
ومراره زي الذل
ما أنا حالي مش بيصُر
أنا اللي صابني الضر
أنا صبري مات واندفن
وحلمي صابه العفن
رحله أخرها الكفن
والقبر مد ايديه
خد روحي وكسرني
ف لحظه دمارني
يا رب صبرني
فضلت اتحايل
يا قبر إلا أمي
دا العمر هو أمي
والضمه حضن أمي
والضلمه بعد أمي
سكنت فى أنحائي
فبلاش تزيد همي
أسمع بقي وقولي
أنا عاوزة أبيع دمي
صفيني من كُلي
أصله خلاص مبقاش
فيه ريحه من أمي
فاضي من الأشواق
والحب ودفاها
والضحكه والفرحه
محتاجه ل دُعها
جوه عيون القبر
مشدوده أحلامي
وكل لحظه حب
وكل أوطاني
أخدتها مني
ضمتها ليه قولي
سلملي علي أمي
وقول لها مشتاق
طعم الحياة حراق
بتكوي ف المكتوب
بتكسر المنصوب
جوايا شئ مسلوب
يا قبر أنا مخروب
أنا خيط غبار ماشي
والدنيا وخداني
يمين شمال ماشي
والريح معنداني
ومشتته كياني
أحلامي وجداني
يا قبر أحزاني
ليا رجاء عَندك
سلملي علي أمي
وبطل بقي عِندك
حافظ علي دمي
وقول لها إني
مستني يجمعنا
لحظه تجمعنا
بعتب عليك يا فراق
فكرت ليه فيا
وزرعت ليه ألمك
فى قلبي وعينيا
طب لما تجرحني
إجرح بحنيه
خفف إيديك عني
وكفايه تظلمني
يا صبر أصرخ قول
أنا ذنبي مش مغفور
أنا ضي من غير نور
أنا حلم مش مفهوم
أنا فرحي ليه مكتوم
رد عليا وقال
أنا صبري محتاج صبر
ربك عَالم بالحال
وكله أخرة القبر
دا كأس علينا ومال
لازم علينا يلف
يسف فينا سَفً
ادعي كريم رحمان
يا مالك الأكوان
أرحم أبوي وأمي
واسترنا يا منان
......... .......... .......
✍ هدى النحاس
ليست هناك تعليقات:
إرسال تعليق