الأحد، 22 مارس 2020

{ أنا مش ناسى يا أمى) ...... للشاعر / رفعت أبو كريم

نتيجة بحث الصور عن الأم المسلمة


بعنوان { أنا مش ناسى يا أمى) (عاميّة)
*******************************
أنا مش ناسى حنّيتك
من يوم ما كنت ف اللّفة
وكنت أنام على حجرك
وتغطّينى واتدّفّى
مش ناسى اللعب ف الشارع
وقميصى الحلو يتمرمت
لمّا بابا يكون راجع
ولمّا يشوفنى يتكبرت
مش ناسى غفوتى ف حجرك
وتحكيلى كمان حواديت
وإيدك تلعب ف شعرى
غفت عينى ودقيقة صحيت
وانتِ لسه بتقولى
متروحشى عند مدبولى
بتاع الورد واللولى
أنا خايفة عليك م الضلمة
كفاية خلاص نام يا ابنى
ليقوم يطلعلنا العفريت
طول الليل مصحّيكى
ماهو حاسس أنا بيكى
بحر الحنان ف عنيكى
كيف أقدر أوفّيكى
وكنت أبص متحير
طب أعمل إيه ؟
ما انا صغيّر !!!!!
أنا مش ناسى تغريدك
وهدهدتك وترديدك
وكان قلبى يتراقص
لمّا تسقّفى بإيدك
أنا شايفك كده كبرتى
وحان الوقت ترتاحى
سهرتى الليل وصبرتى
وكل مناكِ إفراحى
أدينى قعدت قدّامك
بصّى تملّى بعنيكى
إن قولتى ف مرّة يا راسى
أنا بالروح أفديكى
ولمّا تقولى يا ولدى
تلاقينى تحت رجليكى
أنا لو قدت صوابعى شموع
مش هقدر أوفّيكى
يا نبع الحب والينبوع
سنين العمر فدا ليكى
******************

رفعت أبو كريّم (شاعر الصعيد)

ليست هناك تعليقات:

إرسال تعليق

فن البوستات كمال العطيوى