حدوتة مصرية
هنحكي حدوتة عن إنسان بسيط وأصيل
في جبهته تلمح الطيبة وسمار النيل
ضحي بحياته فدا تحرير تراب وطنه
وكان بداية لحكاية نصر ما له مثيل
سافر وساب البلد وامه بتبكي عليه
قلنالها يا ام البطل فايدة بكاكي ايه
إبنك هيرجع ويبقي النصر صاحب ليه
وانتي ساعتها هتدعيله وتفرحي بيه
سافر وأصبح صاحبنا جندي في جيش مصر
والله أكبر بداية سكته للنصر
كان هو وزمايله في الجبهه طوفان جارف
أطاح بأحلام بني صهيون مغول العصر
قاموا علي خط بارليف حطموه تحطيم
أصبح شوية تراب مع انه سد عظيم
لا نابلم أثر ولا أعني الدشم قدرت
علي عزم جيش حر وقيادة بفكر حكيم
رفع صاحبنا علم بلده في أعلي مكان
وكان رصاص العدو نازل عليه طوفان
هتف وقال احنا ولاد مصر متهونشي
علينا أرض الوطن أبدا في أي زمان
ومات ساعتها البطل وقلوبنا تبكي عليه
لكنه فاز بالبشهادة وربه راح يجازيه
وكمان دا واجب علينا إننا نحييه
وأقل شئ نعمله هو إننا نرثيه
شادي الموجي
ليست هناك تعليقات:
إرسال تعليق