سجال شعري بين الشاعرة المبدعه / زيزي محمد ( عضو نادي أدب طنطا )
والمبدع / مجدي فرج عامر
١-زيزي محمد
أنا قلبي فاردلك جناحاته
وبيمد الإيد
فإن كنت صحيح شاري دقاته
ماتروحش بعيد
٢-مجدي
وانا قلبي بيبصم بالعشره
وبيمد خطاه
يتمني يطول منك نظره
ماهو نولتي رضاه
٣-زيزي محمد
الله علي حبك شهد الله
نسيتني ف حبك كلمه آاه
هاوهبلك كل سنين عمري
وهاقولها بعلو الصوت عشقاه
٤-مجدي
طيفك بيمر بيشغلني ويرمي السلامات
ويفوت جوايا ويسحرني وبأحس دفاه
وبيلمس فيه هواه روحي وبيسيب علامات
وبألومه وأعاتبه علي بعاده وظلمه مع جفاه
٥-زيزي محمد
ما بعدتش عنك ولا هقدر
إني أبعد عنك ولا ثانيه
دا الدنيا إبتسمت بوجودك
ووجودك ف عنيه الدنيا
٦-مجدي
وأنا نايم تحت رموش عينك
فين عنك أروح؟؟؟
ماهو كلمه حاقولها بيني وبينك
يا حبيبة الروووووح
٧-زيزي محمد
الروح لو تقدر تتكلم هتقول عشقاك
وهتوصف حبك وغرامك وهتتمناك
والقلب بينبض من وجعه
علشان ما قدرش يكون وياك
٨-مجدي
وأنا قلبي يهلل بالفرحه بس يشوفك
ويقرب منك وبيحضن جواه خوفك
وينادي تردي وبتجاوبي بنظرة عينك
ويحس بخجلك متداري ف نبض كسوفك
٩-زيزي
مكسوفه لكني ببص عليك
وببات هيمانه ف سحر عنيك
عشمانه تحس ف يوم بيه
وتقدر شوقي انا لمعاليك
١٠-مجدي
وبعشمي وشوقي حأدق الباب
فأفتحي ضلف الشباك والشيش
أنا نفسي بجد نعيش أحباب
جوايا ف حضني وما تمشيش
١١-زيزي
لو كان الشيش مقفول دايما
فأنا عيني وراه بتبص بشوق
لو تغلط مره هتلقاني
إذا بس عيونك بصت فوق
١٢-مجدي
متشعلق قلبي في شباككم
كل أما بمر ببص لفوق
ووقعت خلاص أنا ف شباككم
من سحر عينيكي ما بأعرف أفوق
١٣-زيزي
بأستني تعدي قصاد بيتنا
وبطرف عيوني أطل عليك
وبخاف لتكون لحظه نسيتنا
وتفوتني أشتاق واتمني عنيك
١٤-مجدي
ما اقدرش ياوردة حتتنا
ماهو انتي خلاص كعبلتيني
ولمحتك وانتي في جنينتنا
تقطمي بشفايفك من تيني
١٥-زيزي
وشربت الشاي شهد مكرر
علشان معمول من صنع إيديك
لو تسمح وتسيب فنجانك
و تسيبني بإيدي ف مره أسقيك
١٦-مجدي
طاب هاتي الشاي لما نخمس
نحضن فناجنا برمش العين
ونخلي الإيد بقي تتلمس
والباقي الرب علينا يعين
١٧-زيزي
بأتمني ف يوم أدخل بيتكم
وأعمل بإيديا أنا لقمتكم
ياللي إنتو شغلتوني الرحمه
دا الروح مشتاقه محبتكم
١٨-مجدي
اللقمه تناوليها لبؤي
وحاعض صوابعك وايديكي
وساعتها اوعي ف لحظه تدقي
دا انا تايه مغرم بعينيكي
١٩-مجدي
عديت ولمحتك ف الحاره
وعنيه بتسرح ف عيونك
لؤلؤه بتنام جوه محاره
ما أقدرش أعيش دنيا بدونك
٢٠-زيزي
مش جايبه لا شاي ولا حتي جاتوه
وهأقول بيعاكس فيه ياهوووو
وهاخلي الناس كلها تتلم
أتلحلح حبه شويه ياعم
هنشيل الشاي ونجيب شربات
مش بس جاتوه مع حلويات
٢١-مجدي
هاتي الشربات هنا ف صواني
ولا تتأخري ولا تتواني
دا أنا حاطلب إيدك ف ثواني
وحأدق الباب قولي لأبوكي
فيه ناس هايمين هنا وشروكي
علي بيتهم ناويين يا خدوكي
وقوليلهم قلبي أنا عنواني
٢٢-زيزي
ما قدرش ف يوم أزعل منك
فأوعاك تبعدني ف يوم عنك
وإذا مره زعلت تعالي وقول
علشان مانسبش خصامنا يطول
وإن زاد مقدار حبك فيا فوق المعقول
انا مش مسؤول
٢٣-مجدي
أنا قلبي جميل أبيض صافي
دققي جواه تلاقيه دافي
وف بحره يجدف مجدافي
مين قال إني أقدر يوم أخاصمك
ف سمايا بريشة الهوي راسمك
ومضيت اللوحه بإسمي وبإسمك
متشعلقه إيدك ع كتافي
٢٤-زيزي
ورسمت اللوحه بقلم الإيد
ورسمتك جوه ف كل وريد
ما أعرفش إزاي هأقدر أكمل
والشوق عمال جوايا يزيد
٢٥-مجدي
ورسمت ملامحك بالتحديد
وباعيشك حب جميل وجديد
وباحسك جوايا بتجري
ف القلب وف الشريان ووريد
٢٦-مجدي
نفسي المس روحك من جوه
ومشاعرك احضنها بقوه
وتنامي ما بين درعاتي سنين
ما انا حبي شديد زي النوه
٢٧-زيزي
النوه دي بركان جوايا
عمال بيفور وتملي يزيد
وارتاح وابعد عنك
بلقاني بحبك حب جديد
٢٨-مجدي
خمسات حنشبك صوابعنا
ونقرب قوي اكتر واكتر
وسعيد ان لبعض رجعنا
والليل ودفاكي يكون اخطر
٢٩-زيزي
هات إيدك يلا الإيد ف الإيد
نغلب أيامنا بعزم شديد
ونجدد أحلام وأماني
والليله دي تبقي دي أجمل عيد
٣٠-مجدي
متشعبط ف هواكي ودايب
عن عشقك أبدا ما أنا تايب
بس إوعي تروحي تغيبي عني
راح نفضل عشاق وحبايب
٣١-زيزي
أنا اسعد منك برجوعنا
وأننا بنشبك صوابعنا
وحلفت بحبك عمري ما اسيب
والعالم كله هيسمعنا
٣٢-مجدي
العالم كله حيسمعنا
والكون وبراحه ما حيسعنا
مفتون بجمالك سحراني
ومعاكي لقيت للهوي معني
٣٣-زيزي
ماهو مهما بعدت انا هأبقي معاك
ولا عمري ف يوم قلبي هينساك
دا مكانك جوه ضلوع الروح
والقلب ونبضه يهونو فداك
٣٤-مجدي
وأنا مهما لقيت منك نسيان
راح أفكر قلبك بالماضي
ولا يوم أعلن عني العصيان
وأتمني يكون عنى أنا راضي
٣٥-زيزي
بالراحه عليه وعلي قلبي
الذنب دا ذنبك مش ذنبي
أنت إللي هويت ف شباك العين
آااه يانا عليه وعلي غلبي
٣٦-مجدي
أنا واخدك ع كفوف الراحه
في هواكي بأتمهل وأتأني
وحاقولها وبأعلنها صراحه
إنتي إللي القلب بيتمني
......
زينب محمد ...
مجدي فرج عامر
12.03.2020
كان ليا الشرف اني اعمل السجال دا مع عمنا واستاذنا الشاعر الكبير ا/مجمد عامر
ردحذف