خلى بالك من عيالك يا بهانه
واوعى مره ترضعيهم
من صدور الإستكانه
أو ف مرة تحسسيهم بالإهانة
خلى بالك من عيالك
واحفظيهم م المهالك
دى العيال ..ف البيت أمانه
والأمانه إلى صانها
شمس بتنور زمانها
وف أوانها هتشوفيها
سيف على رقاب الخيانة
يا بهانه
شيلى ابنك جوه عينك
واروى حلقه بشهد نيلك
ده الصُغير .. بكره يكبر
وتلاقيه صاحب مكانه
بكره يبقى النور ف ليلك
وبعلامه يكون دليلك
للريادة والسعادة
وان ف يوم حكمت يكون لك
ف الحروب مدفع ودانة
يا بهانة
ابن بطنك مش صغير
لجل ما تدوسه الدبابه
ابن بطنك مش قليل
لجل يبقى م الغلابه
والزغابة رايحه جاية
تنهش الخير م الكنانه
يا بهانه
العيال ف الدار جعانه
والمحمر والمشمر
كل يوم بيفوت ورانا
للى طفى ف يوم شموعك
واللى راضى يشوف دموعك
مالية كاس الخوف حدانا
يا بهانه
صدقينى لما أقولك
إن فُلك لونه باهت
وان وردك فوق خدودك رحته تاهت
وان سكتنا يبقى موتنا فرض واجب
واللى حابب يبقى ابنك
صعب يقبل بالإهانة
***********************
رضا أبو الغيط
ليست هناك تعليقات:
إرسال تعليق