بتقولى لمين ..... للشاعر / رضا ابوالغيط

بتقولى لمين انك ماشيه
من حضن الدار
وانك مش طايقه ومتضيقه
والعيشه مرار
للواد الحاضن ببرونه
وبنسد ضهره بأحلامنا
ليل ويا النهار
وللا للبت المركونه
على شبه جدار
بتعافر لجل ما تتدادى
وتدوق الشهد اللى ف ايدك
وبواقى خيار
بتقولى لمين انك ماشيه
من حضن الدار
الولْد صغار
والبيت محتاجك ياعزيزه
فبلاش ينهار
وان كنتى زعلتى من الحاله
وكلام السِلفه والخاله
فكلامهم ليكى..... والنعمه
كان كله هزار
معقوله نزعل قمرتنا
نوارة... بيتنا وحِتتنا
واحنا اللى ما لينا ف دنيتنا
غير ست الدار
طب مين هيشيل هم العيله
وهيبنى لقلبى الضُليله
ويفطر احمد وجميله
ويكمل جنبى المشوار
البيت محتاجك يا عزيزه
فوتى الخلاقات
وبلاش العند اللى ف راسك
ليزود بينا الخلافات
ويشمت فينا اللى ما حبك
ومرات الجار
فوتى خلقاتك يا أصيله
وبلاش تلطيش
وتعالى نفكر بالراحه
ازاى هنعيش
وازاى من ايد الفلاحه
هندوق العيش
وازاى الورد اللى ف خدك
هيزين الدار
محتاجه يابت انى اوصف لك
ازاى هيكون
قلبى المتعلق من صغره
بأجملها عيون
وللا محتاجه تبكينى
بدموع العين
وأتوه ف السكه اللى ما عارف
وخدانى لفين
وأعيش محتار
مستنى جوابك يا عزيزه
على جمر النار
ياتِهدى الحلم اللى بنيته
وحيطان الدار
ياتقولى مسامحه ونقلبها
للصبح هزار

*******************
للشاعر / رضا ابوالغيط