مع إني واد مجدع .... للشاعر / محمد واصل

مع إني واد مجدع
ومع إني واد شواف
حاطك قصاد عيني
مع إني مش بتشاف!!!

لحست ترابك يابلد
لجل ماتحبيني
طب بس ليه يابلد
ماشي علي هواكي
وتملي بتعانديني
وانا برضو الولد
إللي ياما عشانك شاف!!!

لما كبرتي وقفت انا ف صفك
خذلوكي إللي حبيتيهم ياكرهاني
وانا الوحيد ناصفك!!!!
بالغت انا فحبك ولا بالغت انا ف وصفك؟
بقفقف في عز البرد من غير لحاف حاف

صعبتي ليه المسأله؟
وصوتك في الحق خاف
لا جمع ولا قسمه إنما
طرح واستلاف
فيكي نهر النيل ياخصبه 
وإزاي سنينك عجاف؟!!!
..............................
 للشاعر / محمد واصل