السبت، 14 مايو 2022

مطمرش ......... كتبها /خيرى صابر

 


 مطمرش

كتبها خيرى صابر

ليه قلة الأصل بقت ع الكيف

وبقى اللسان اطول م السيف

والخلق صبحت ما تقدرش

اهو كده مطمرش وكده مطمرش

بقى الكلام فى البق لبان

رجاله كانت أو نسوان

ولا عدش صاحب ليه صاحب

والناس بتاخد ولا تشكرش

اهو كده مطمرش وكده مطمرش

خلص الضمير مبقاش فى السوق

وف الهبل بقى كله يسوق

حتى الذمم هربت على طول

من البشر سريعا مرش

اهو كده مطمرش وكده مطمرش

الدنيا بحر وانا ماليته

عملت طيب فيه رميته

لان طمعان فى الاخره

وف الاخره جنه ماتتقدرش

اهو كده مطمرش وكده مطمرش

فاضيه القلوب م الحب مفيش

والحب مات مبقاش بيعيش

والكل بقى نازل تنتيش

والاخره ليه مبنفكرش

اهو كده مطمرش وكده مطمرش

فى حياتى شوفت كتير وقليل

وكفة الاندال بتميل

واما الغلابه دموعها تسيل

ترفع ايديها لرب العرش

اهو كده مطمرش وكده مطمرش

صاحبى يوماتى كان بيجينى

ويقولى معذور وادينى

دلوقتى تيجى عينه ف عينى

يشوفنى يعمل سريعا مارش

اهو كده مطمرش وكده مطمرش

بقى كله ياخد ولا يديش

واللى بتاخده الناس مايجيش

ويزعلوا لو قولت مفيش

واللى بياخدوه مابيرجعش

اهو كده مطمرش وكده مطمرش

 

 

 

 

 

ليست هناك تعليقات:

إرسال تعليق

فن البوستات كمال العطيوى