السبت، 14 مايو 2022

الكيل طفح ...... للشاعر / متولي زياده

 

 


( الكيل طفح )
الكيل طفح
قلب الكنانه بيندبح
ملعون ياكل اللي عفا
ملعون ياكل اللي صفح
عن كل اخوان التتار
عن كل اعوان الدمار
عن كل ألوان الحصار
يانبض قلب بينكبح
الكيل طفح
اعلنوا فيها الحداد
وشحوا قلوبها بسواد
فرحوا فيها الموساد
الدم ساد
سكت الكلام ،، جف المداد
ياملايكه طايفه فوق رفح
الكيل طفح
الدم سايل ع الحدود
بتقول يادم الهم زود
عن كل شمعه بتنطفي
عن كل دمعه بتنجرح
والكيل طفح
الذنب كان مش ذنبهم
دي جنود بتعشق أرضهم
قدر وكان مكتوب لهم
علشان يخلد ذكرهم
ياسينا بينا الحلم جي
كلم من شهيد جواك حي
وبدمه فارد ألف ضي
على كل شبر بينطرح
حاسس في قلبك بالفرح
والكيل طفح
ياحلم كان عاوز يعيش
بادئ في سكه ماتنتهيش
وفي لحظه ضاع الحلم تاه
بإيدين خسيس ماسمعش آه
قتلت معاه معنى الحياه
برصاص شيطان لابس شبح
شفنا البراءه في الوشوش
قامت ترفرف ع النعوش
فاضل سؤال من غير رتوش
هوه انتوا ليه مابتفهموش
آن الشهيد ده اكيد ماماتش
وان الحكايه دي ماانتهتش
وان اللي ضارب بالرصاص
مستني دوره في القصاص
مهما خياله هناك شطح
والكيل طفح
مين فينا سلم بللي كان
او راضي انه يعيش مهان
علشان يراضي الشخشخان
ويراضي كل اللي صفح
فات الأوان ع الطبطبه
ياخلق عايشه في الغباء
المصري عمره ماانكبا
ولا جيشه عمره هينكبح
ملعون ياكل اللي عفا
ملعون ياكل اللي صفح
والكيل طفح
شعر
متولي زياده


ليست هناك تعليقات:

إرسال تعليق

فن البوستات كمال العطيوى