ضنايا الحبيب مات فى الجيش
ذنبه إيه يا ناس قالوا ما فيش
لا كان إرهابي ولا تاجر حشيش
وكان فرحان لما اترقى شاويش
مش قادر من بعده امضغ العيش
** **
الميرى كان لايق عليه وزيادة شويه
وكان فرحان قوى بحياته العسكرية
وقال لازم أدافع عن الأرض المصرية
أهو راح يا ناس ومالوش للأسف ديه
بس ربنا يرحمه مات شهيد وضحية
** **
كان نفس يفرح زى أصحابه
من شهرين بس كتبنا كتابه
وقال رايح يعزم كل احبابه
وهاينزل يفرح باللى جابه
الفرش والدهب وخلاص سابه
** **
عروسته كانت مستنياه ع الفرح
سمعت الخبر يا عينى قلبها انجرح
وأمه سقطت ع الأرض والصوت أتدبح
وصاحبه من الحزن فى الطريق انطرح
صبرنا يا رب والله عندنا الكيل طفح
** **
كنت يا ابنى بين الشباب زينة
وبعدك يا حبيبى كل البلد حزينة
وعروستك الحلوة الطيبة الرزينة
قالت يحرم الفرح بعدك يا حيلة
كفاية كان بيقولى عيونك كحيلة
** **
مصر مش هتنساك يا حبيبى
بس مين هايطفى بعدك لهيبى
مين تانى يحط الفلوس فى جيبى
مين غيرك هايعطف علىّ في شيبى
مش هايعوضنى صاحبى ولا قريبى
ضنايا مات في الجيش
ليست هناك تعليقات:
إرسال تعليق