راجل فقير ... للشاعر /خالد سعد
راجل فقير تحت خط الفقر
يصحى على شغله قبل الفجر
شقيان سنين لما جهز المهر
وعايش تعبان طول الدهر
لا عنده في الدنيا فيلا ولاقصر
وصابر على الدنيا عايش صقر
وعارف إن كل شئ بقدر
يرجع من شغله شارب المرار
كلامه جد مش فاضي للهزار
يتغدى عيش وجبنة وخيار
هايعمل إيه في غلا الاسعار
ها يكفى يا عينى البقال ولا الجزار
ولا يعمل إيه في جشع التجار
عايش في دنيا بقت نار
بس عايش طول عمره شريف
ولا كان يوم قدام المال ضعيف
لا عرف سخان ولا تكييف
وبيدعى دايما ربنا اللطيف
إنه يفضل على الدنيا خفيف
ويقسم مع مراته الرغيف
ويعيش طول عمره عفيف
مراته الغلبانه عايشة معاه
كل يوم يحكى ع اللى جواه
تواسيه وكل حاجة على الله
وتضحك لما يخلص غداه
وكل حياتها لو طلبها فداه
والصحة والسعادة كل اللي تتمناه
وكلامها الحلو كل دواه
ليست هناك تعليقات:
إرسال تعليق