قرصة قبر
اتحركت
كل المشاعر ناحيتك
وف سٍكتك
تاهت خطاوى فَرحتى
وف دَمعتى
غٍرقت مراكب دُنيتى
واصفر لونى اللى ابتدأ
يشكى الوريد للأفئده
وانت مشاعرك تَلّجت
ما هَمها لوم العٍدا
ولا دمعه عاشقه الفضفضه
طول عُمرها
كان نٍفسها
تسأل عٍيونك عن سبب
موت العواطف والأمل
والإنتحار المُحتمل
كان نٍفسها
تسأل هواك
كان ايه جرا ؟؟؟؟
خَلٌاك تبيع اللى اشترى
وتهد كل اللى إتبنى
لحظة زعل
يا هل ترى .....
ايه سَكْتك ؟؟؟
خَلٌاك تدارى ضحكتك
تحت الثرى
معقوله حُبك كان عدم
وكلام عيونك كان هوا
لعيون حبيب كان لك هَرم
كان لك دوا
وهواه سَعادة حَضْرتك
يا قَسوتك
يا أبو قلب أنشف م الحَجر
يا فرع من أصله انكسر
بالمختصر
دى غلطتى مش غلطتك
أنا اللى قلبى صَدقك
يوم ما خَدَعْته بٍطَلّتك
واستسلمت
ايدى لإيديك المدهونين
بعذاب سنين
كل القلوب المجروحين
وأنين جراح
كل اللى ماشي ف سٍكتك
رضا أبو الغيط
ليست هناك تعليقات:
إرسال تعليق