اسمعونى
أنا السايح فى أرض الله
أنا الجايز
أقول الأه
وجوه ف قلبي توجعني
ولكن مين هيسمعنى
وهشكي لمين
بلوتى لسواه
أنا المنحوت ف تفاصيلك
أنا الساهر
طوال ليلك
وانا الزارع خضار أرضك
وانا الشارب عكار نيلك
وعايش كل لحظه معاه
وبشكى له
ويسمعنى
وبسمع شكوته ونجواه
أنا السايح
فى أرض الله
فرشتى أرضه !!
وغطايه سماه
بحبك ليه
وكارهانى
وبالرخيص والبخس
بايعانى
الأه بقولها وجعانى
وليه ماتقوليش مالك
قعدت سنين
أحسبك أمى
ولما جيت
أطلبك بالحب
عشتى دور
مرات الأب
ومن حضنك حرمتينى
بحبك ليه
وليه مرتبط بيكى
وانت قاصده
تهينينى
وتلونى سنينى
بالسواد والقهر
وانا الواد
الناحت على جبينه
حدود أرضك
وناسج علمك
من خيوط الفجر
اللى كان رافض
يطلع فوق ظلم واديكى
واديكى بتردى الجميل والفرض
ومرمطتى بأهلى الأرض
ومشرده ف البلاد أولاد
طموحهم زى نور الشمس
ضيعتى يومهم وبكراهم
وكرهو فيكى قهر الأمس
وان جه وعاد
تقعدينا كالجماد
مستنى نظرة رضا
ولقمة عيش لأولادنا
ملقطينها من أيادى الخلق
للشاعر / فرج السقا
ليست هناك تعليقات:
إرسال تعليق