مش هو دا وليدي ولا حتي دى ريحته
كات طالته عيدي وضحكتي راحته
إيه غيرك جُولي ولا عشان شبيت
دا أنت يا واد ضِلي وأنت الونس والبيت
و أنت اللي فاضلي من بعد أبوك
حجيت صليت في بيت ربنا ودعيت كتير وبكيت
يهديك ويهدي أخوك
برجع معاك لزمان يمكن تكون ناسي
أيام ما كنت صِغير وفرحتي وناسي
كنت أصحى طول الليل
وأسخن الخلجات ولف فيك يا عويل وأعملك الحبات
إشي حبة البركة وشويه م النعناع
معجول مفيش بركة وشجاي كله ضاع
وكبرت من جَلبي وأخدت من طولي
أنا جُلت دا سندي ربي بعت هولي
كان يختفي تعبي ولدي خلاص كبران
واركد وراك وأجري لو جلت يوم تعبان
ينهد حيلي أوام يصفر لون صدرى
أحس بالتوهان وأدعي وأجول ربي
ولما تتحسن أحوالي تبجي تمام
ماهو كل شئ بيهون إلا الضنا يا جبان
كل الصور جِدامي والماضي صوته حزين
أنده يا واد علي مين واجله تعبانة
وأنت اللي خدت سنين وسنيني زعلانة
معجولة دا وليدي اللي راعيته زمان؟
وراويته من دمي ولا شاف ف يوم حرمان
إشتلته ف حشايا وألامي كات بتهون
كسيته بدفايا ولا بات ف يوم عريان
ورضيت تعريني ؟؟ ووفَجت تِهَملني ؟؟
جلبك يا واد هودك إنك تزعلني!!!
لو الحيطان تنطج كانت يا واد تصرخ ماهي شاهدة ع الأيام
باشت خلاص م الهم مالت من الخزلان
خلعت توب جدك وجريت ورا الأوهام
وهجرت سجادتك جَربت م النسوان
وكمان بجيت ترجص وبتسمع الأفلام
إياك تكون فاكر إن الإله غفلان
ربك صحيح يمهل ويمد ف الطغيان
دا لكل شئ آخر ويا خوفي م الطوفان
أنت يا واد غافل ولا عينيك عِميان
أرجع يا واد جلبي وأعمل حساب أخرتك
ليه بس تتمادا وتشيل يا واد ف ذنوب
إرجع يا عمري وتوب
جلبي اللي شاب مَجَدِرش
يمحي الحنان م التوب
ببكي وصوت البكا لف الوجع وياه
وخد معاه الألم وخد معاه إل أه
وسرح ف شراييني
معجوله هتجيني!!
لَمِسة إيدك تِشفي وتلم أوجاعي
ولا ملوش داعي هنشحت الحنية
دي مركبة ف ميه لو خرم يخدشها
تغرج ولا تبنشي
إمشي خلاص إمشي
مش عاوزة إحسانك
ولا حتي إحساسك إني يا واد أمك
يا مراري فين دمك خيري أتمسح منك
ملوش لزوم نوحي ورضيت أنا بجِسمتي
لو ربي خد روحي فتش يا واد فيا
هتلجي لك جِسمه يا وليدي ف محبتي
هدى النحاس
ليست هناك تعليقات:
إرسال تعليق