نفسي مرة تانية اشوفك
و ابكي على صدرك و اقول
اشكي ليكي هموم حياتي
و تقولي لي ع الحلول
اعمل ايه مع ناس بتضحك
لما تتقابل عيوننا
فجأة يرمو الخوف علينا
ديما خالفين ليه ظنوننا
و اعمل ايه مع ناس قرايب
و الحياة كت واحدة بينا
و النهاردة بيظلمونا
اصبحو عاشقين انيننا
باعو كل حاجات جميلة
كت ما بينا و بنصايحك
كل يوم جايين بحيلة
نسيو حتى جمال روايحك
الخصام بقى فرض دايم
و البعاد بقى أمر واقع
اتنست كل الفضايل
و الزروع قسوة و مواجع
رغم اني يا أمي عايش
بالتمام كيف ما انتي قلتي
الكبير ع الراس تشيله
جه و خد كل اللي حيلتي
ناس كتير م الاهل شاهدة
ع اللي حاصل و اللي داير
إنما علشانك انتي
هارخي على وجعي الستاير
هاطفي نار جوايا قايدة
و اوعدك هافضل ف حالي
بس اشوفك و ابقى بيكي
أقوى من جرح الليالي
ليست هناك تعليقات:
إرسال تعليق