نرمين
********
نرمين
غير كل الناس اللى تشوفها عينيك
غير كل الورد اللى بيطرح
فوق كف ايديك
نرمين
بستان
وحنان
وسنين
وآيات الحُب اللى تنور
فوق أى جبين
والفرح الطارح حِنيه
ف ليالى العيد
لو كُنت بعيد والقلب حزين
نرمين
ألوان الطيبه اللى بتملا
قلب الأطفال
وجمال الضحكه اللى تِهون
تُقل الأهوال
ف زمان الصمت المتغلف
ببواقى أنين
نرمين
أفكار العقل الموهوب
والنبض ف قلب المحبوب
لا تحب الظلم
ولا عاوزه تشوفك مغلوب
ولا تلبس توب المسكين
نرمين
أوراق العِلم المنشود
والجود الطائى اللى ف دارك
ومالهشه حدود
بتسود العالم بمبادئ
أصل التكوين
وآيات الحق المتربع
فوق الموازين
نرمين
خيرات الكون
وعفاف الدُّر المكنون
من أول خلق البشريه
وليوم الدين
بتحب النور
ومنابع طرح الإحساس
لا ف يوم بتجور
ولا ظلمت بعيونها الناس
بتسامح كل اللى ظلمها
م البنى أدمين
نرمين
ف الصف الأول من يومها
وهمومها
ما تشوفها العين
بتواسى كل اللى يقاسى
ودموعه فوق الخدين
نرمين
الرايه اللى تشوفها عيونك
بترفرف فوق الميادين
العزم اللى بيصلب حِيلك
ولا عُمره يلين
نرمين
ياسمين
بيعطر بالحُب حياتى
وحياتى.. مِلك لنرمين
*********************
رضا أبو الغيط
ليست هناك تعليقات:
إرسال تعليق