أنا اللى بزرع ورد
والورد يطرح شوك
و أبنى البُنا يتهد
بدل مايطلع فوق
و انا اللى شهم و جدع
و افهم قوى فى الذوق
شوفت ف زمانى البدع
و تملى أنا المحقوق
لو انحنيت لجمال
يقولوا بيعاكس
و اضحك فى شيل لاحمال
يقولوا واد باكس
و اما أرفع التكليف
يقولوا مش طاهر
و انا اللى عيشت عفيف
و ان كان ماهوش ظاهر
و اتهمّش و اقول معلهش
و اقول مسيرها تروق
وشى خلاص كرمش
و عينى ضى شروق
و افرح كما عيل
فرحان بأتفه شيئ
و اعيد من الأول
و انا حافظ الطريق
ساعات يجينى المرض
ازهق و استسلم
و اقوم و ادارى العرض
اكمنى واد مسلم
و اركب بساط الأمل
و اطير لفوق كالريح
و اجّد وقت العمل
و اهيص مع التفاريح
و اخش تانى فى ملل
م القسوه و التجريح
بيجرحونى الناس
علشان تملى صريح
و يجرحونى ناس
علشان فى شعرى صريح
مش كل شئ ينكتب بالمكر و التلميح
و لا كل شئ ينكتب ببجاحة التصريح
الشعر له قالب و الشد ع الهادى
فى بحوره تفرد شراع لما يكون هادى
و الموجه لو عاليه
ماتعومشى ضد الريح
ليست هناك تعليقات:
إرسال تعليق