افرحى لى
**********
افرحى لى
واوعى تبقى زى ليلى
اللى رافض يبقى صاحبى
أو دليلى
افتحى لى مره قلبك
واكتبى لى إنى حُبك
وانى نيلك
وانتى نيلى
افرحى لى
واوعى تانى تجرحينى
يا اللى عشت العمر ليكى
ولعينيكى كان رحيلى
افرحى لى
لما أعافر وأبقى شاطر
وأما أجيلك
وسط غابه م الخاطر
لجل أشوفك
وأملا جوفك
وأبقى ليكى سلسبيلك
لجل أقولك
وتقولى لى
إنى منك وانتى منى
واللى بينا كان حقيقه
مش تَمنى
افرحى لى
وافرحينى
وامسحى لى كل دمعه
كات بتجرح نن عينى
واسمحى لى
أرمى نفسى جوه حُضنك
واشكى ليكى من سنينى
اسمحيلي لى
أنسى ويلى بين شفايفك
وأخبر القلب اللى شايفك
انى زى ما كُنت صُبحك
شمس حُبك
بتناديلى
*****************
رضا أبو الغيط
ليست هناك تعليقات:
إرسال تعليق