تقول إيه
عايز تكتب
ليه
ولمين ؟
للذكرى
لفاطمة لما تكبر
جايز تلاقي الطريق من سنين
اللي انت ضليته
تفتكر يوم الزحام
كان هناك خالك سعيد
مات وسابلك جلابية طين
إلبسها
استر دمعتك يا حزين
مالك ساكت
فاكر إنك لو سكتت
راح يطنش عزرائيل
لا يا فالح
كله رايح
حتي أنا
والواد حسين
كله رايح من هنا
تعرفش سبب الموت إيه ؟
مرض وعافيه
فقر وغنى
ضحك وبكى
فجأه كدا
كان يحصل إيه يعني
لو بس يرضى الموت ياخدنا مرة واحدة كلنا
ماكانش فيه حد بكى وجع الفراق
مر فراق الأحباب
صعب اللقى بعد البعاد
رشا عبد المنعم
ليست هناك تعليقات:
إرسال تعليق