خيالك جه وصحاني
ناداني.. قوم..
تعالى اتهنَّىٰ يا محروم
بُكره تنام وتشبع نوم
شَدّ غَطَايا من فوقي
قال لي تعِبت من شوقي
بقالي كتير معاك مظلوم
قُمت قَعدت عَ المكتب
حَطِّيت القَلم في الحبر
مَلِيتُه وقُلت أمَّا اكتِب
أخَدنِي من الكتابَة الفَجَر
نويت قَبلَه أَصَلِّي الفَرض
سَجَدت و جَبهِتي عَ الأرّض
خيالك قال لي إستَنَّي
حبيبي إدعي واتمَنَّىٰ..
حَسِّيت إنِّي في الجَنَّة
ومتوَضِّي ب مَيِّة وَرد
نَهِيت الفَجر ب التَسبِيح
ل إسم الله
دَعيِت يِوهِب لي بيكي
حياة..
وبَعد ما شيلت سِجَّادتي
لَقِيت قَلَمِي في مَحبَرتِي
رَفَعتُه كَتَبت كَ عادتِي
بَدَأت قَصِيدتِي..
بسم اللَّه..
قصيدتيِ إسمَهَا (مُنَاجَاة)
في سَتر الليل أُناجِيكِ
مُنَاجَاة النجُوم ل الشَمس
و بين سُطُوري أَدعُوكِ
أجيبيِ صُوت نِدَاء الحِس
جاوبي ب كلمة واحدة
و بَس...
أنا الناسِك في مِحرابك
علىٰ بَابِك هالات من نُور
فَ بُوحي ب الهَوَىٰ المَستُور
و صُدِّي كُل خُطَّابِك
خُطَّابِك حبيبتي طابور
ب اغِير مُنهُم وانا مَعذُور
ومِستَنِّي يجيني الدُور
أَقَدِّم ب الرضا قلبي
أقولك أد إيه حُبِّي..
توافقي حبيبتي علىٰ طَلَبِي
و تُجبُري مُهجِة المَكسُور
آخدك فوق فَرَس بُنِّي
واطير بيكي ف ضَهرِي الريح..
عشان الكُل حاسدِنِّي
وياما ف الهويٰ مَجَاريح..
ب اخاف مِنهُم
أدَارِي عَنِّنَا عيونهُم
عيونهُم سِم
ب تَختَرِق القلوب
كَ السَهم
وتِرشَق حَتَّىٰ
جوَّه الحِلم
حِلِمت ب عِيشتِي
وَيَّاكي وقَرَّب حلمي
يصبَح عِلم
كأنِّي ف فيلم رومانسي
وانا وانتي النجوم
في الفيلم..
مَضِينا أوتوجرافات أكتَر
آخَدنا ييجي 100 أوسكار
وجالنا 500 أوردَر
ل فيلم جديد..
ما هو انتي البَطَلة
ب التأكيد..
وانا وياكي نجم
العرض
لقيت لسه الجبين
ع الأرض
وانا ساجد ب اصلِّي
الفَرض
ب ادعيلك و ب اتمَنَّىٰ
أعيش وياكي في الجَنَّة
ما هُو انتي جَنِّتي
ع الأرض
وحتىٰ قبل ما القاكي
كَتَبهَا المَوّلَىٰ نبقي
ل بعض
نعيش مع بعض
نموت مع بعض
نِتسَنِّد كمان علىٰ بَعض
د/نشأت عادل
ليست هناك تعليقات:
إرسال تعليق