(قناوي جواب رقم 2) ......... الشاعر نشأت عادل

 

(قناوي جواب رقم 2)

سلام الله عليك يا ابني يا واد بطني

غيابك واللَّه لخبطني

مَانِيش عارفة أقُول لَك إيه

طمنِّي غيابك ليه؟

ده تاني جواب ب اشدُّه لك

برضه ما جاني منَّك رَد..

باقي إيه أقُولُه لك..

زعلانة وما قولت ل حَد

ب اكتب لك ودمع العين

عِصِي ينزِل

أَخَد على خاطره يا ابني القلب

قاعدة لوحدي ف المَنزَل

من غيرك في إيه يتحَب..

ها احِب الحيط؟!

ولَّا اشكي ل طين الغيط!!

حزين يا قناوي حتى الحيط

خلاص خَيّتَك في بيت جوزها

بقى فاضي عليَّا البيت..

وَحيدة يا وَلَدِي من غيرك

أقولك سِرّ..

بارحَة نِمت في سريرك

أتلَمِّس يا واد رِيحتَك..

لقيت صورتك في تسرِيحتَك

حسيتَك قُصَادي يا واد

يوم ما ولِدت وانت ضَعيف

كان قلبك يا قاسي نضِيف

جنبي أبوك ب يندَّه ليك

كان ل الحق فرحان بيك

كنت صَغير لكن باينه

رجولتك فيك..

شُفت الجَنَّة جوَّه عينيك..

يا قناوي بَقِيت بيك أُم..

وانا نَفَسَة و ب انزِف دَم..

نسيت بيك الألم والهَم

يا رب تكون يا وَلَدِي بخير

قناوي.. إيه جرا ل قلبك

ما كنت عَطُوف..

عينيك الضَيقِين برضك

كانت ب تشوف

تكونش يا واد بقيت حَلُّوف!!

قناوي الدار ملاها الخوف..

قلب بهانة هَا يسامحك

كما العادة.. ضناه البُعد

ف غيابك.. بقىٰ زيادة..

فَ تَعب القلب..

زاد الضغط في الشرايين

صار لي ف التَعَب شهرين

بهانة هَدَّهَا بُعدَك..

بَقت عَيَّانة من بَعدَك..

فَ قُول لي ليه عدَم رَدَّك

ده تاني جواب..

فَ طَمِّني إيه الأسباب

يكونش يا واد ضميرك شاب؟!

ما طول عُمرَك ضميرك حَيّ

فَرَّح قلبي يا قناوي..

قول لي عَن قُرَيِّب جَايّ

صارحني لو في قلبك شَيّ

عيون اُمَّك فارقها الضَيّ

وكيف تضوي العيون يا ابني

وانا مش خابرة عَنَّك شَيّ!!

طب ابعت حتىٰ تَصوِيرة

تكون ل القلب تَصبيرة..

تقول لي ان انت فاكرني

و كلمة زين تِصَبَّرني..

عشان صَمتَك مِحَيَّرني

مانيش عارفة أراضِيك فين

ما طول عُمرَك حَدِيتَك زِين

يا واد جِبت القَسَاوة منِين

يكونش يا واد ما رَضّعتَكش

إيه يا قناوي!! ما بتفهَمش..

رِضِعت لحَد ما بقيت جَحش

خَلَّصت الحَليب كُلُه..

بهانة لَبَنها فيك ما نَفَعش

حنانها عليك كمان ما طَمَرش!!

ها تفضَل طول حياتك جَحش!!

قول يا قناوي إيه الأخبار..

بيسألني عليك الدار..

ها يطلع إيه يا ولدي الجحش

أكيد لازم ها يبقي حمار..

ده حتىٰ حمارنا عندُه شعُور

ب يزعَق لمَّا ييجي النور..

يصَحِّينا نروح الغيط..

حُمَارك مش حمار سَكَّة

ولا كان عُمرُه مرَّة عبيط..

زُنفُل عارف السِكَّة..

وعارف اللي فوقُه غَبِيط..

تكونش كمان نسيت الخُرج..

حدايا كمان مِعَسِّل بُرج..

باقي من روايح ابوك..

الله يرَيَّح اللي جابوك..

قناوي زِهِدت في الدِنيا..

ما عُدتِش حَابَّه اعيش ثانية

من امبارحه ما خدت دَوَاي

مفيش ف الدار حَدَايا سواي

ماعادش فيه كمان صِحَّة..

أَقُوم اعمِل ل روحي الشاي

فَ قول يا قناوي إنك جاي..

يِخِف القلب م الفَرحَة..

لكن في البُعد اخِف ازاي!!

علاجي ماهوش حُقَن وحبوب

تِعِبت يا وَلَدِي م البلابيع..

خلاص مابقاش في عمري كتير

فَ طمنِّي قناوي عليك..

و سيب قساويك..قول لي

ان انت يا ابني بخير

قلبي يا ولدي دايب دوب

راضية وصابرة ع المكتوب

وربك برضه رب قلوب..

إوعاك منِّي يا ابني تضيع

ختاماً كبشتين سلامات..

معاهم حفنة م القبلات..

سلام الله عليك يا ابني

وابات القاك هنا ف حُضني

قناوي البُعد دَوِّبني..

بهانة ضناها خوفها عليك

ضنايا ربنا يخليك

يبارك فيك..

وتفضل دَعوِتي تحميك..

يا قلب امَّك

باعتاه ليك

بهانة امَّك

د/نشأت عادل