يا عمنا
إزاى حاتضحك للحياة
والليل قمر
مخنوق وحابس دمعته
زرع الغلابه فى أرض بور
وابنى لسة ف الطابور
مستنى طرحت زرعته
يا عمنا
إزاى حاتضحك للحياة
الساقية لفت لفتين
والأرض شرقانة الحنين
والمية جفت دمعها
أرض الغلابة الشقيانين
طرحت عيدان .. حبلانة خوف
أنزل وشوف .. تلقى المأسى مطننة
يا عمنا
إزاى حاتضحك للحياة
والصيف بيزعق ف الخلا
و الليل مكسل فى السما
ساكن حطان الدار .. ومستنى النهار
والبنت واقفة ع الشوار
دا العمر طال الإنتظار
لف المنادى ينادى .. فى الميادين
عريس وتايه من زمن طول السنين
شايل فى إيده بسمتُه .. وحبت كلام
أرغول بيعزف بالوجع
وف سكته الفين منادى ينادى
على كام شاب تاه
يا عمنا
إزاى حاتضحك للحياة
الشاعر
حسن السحماوى
ليست هناك تعليقات:
إرسال تعليق