(سيدنا الفساد)
سيدنا الفساد لما انتشر
خلف ولاده من البشر
ابليس وقاعد وسطهم
من ظلمهم قام اعتذر
وجاب ولاده كلهم
يتعلمو وياخدو العبر
وفي ودنهم بيقول لهم
اتعلمو شغل الغجر
دا اللي بيعمل زيهم
بالبيضة يلعب والحجر
والواطي يعلى عندهم
ويركبوه حتة همر
ويقولو نازل من السما
في الاصل كان زي القمر
موهوب وعارف ربنا
يعرف كمان حكم القدر
اصل الفساد لما انتشر
خلي البشر مبقوش بشر
والخلق اكلت بعضها
والقلب بقي زي الحجر
والارض كرهت بطنها
لما اتمنع عنها المطر
والزرع واقف في العزا
خايف يموت زي الشجر
او يعلي عوده للسما
وفي لحظة واحدة ينكسر
والناس بتشكي لربنا
من الظلم فينك يا عمر
ليه اتقتل بينا النبي
ورجعنا نعبد في البقر
هي القيامة قربت
ولا المسيح بينا ظهر
اصل الفساد لما انتشر
الظلم جوانا انتصر
رافع سلاحه في وشنا
خلي الشرف بينا انتحر
والديب بياكل في الغنم
وبيرفعوه ويا الخبر
وبيسجنو في اللي اتظلم
ويمجدو في اللي غدر
فين اللي كان بيضمنا
ويغطي روحنا من المطر
كنا بنحمي في ارضنا
لو تبقي في وسط الخطر
والخير تمللي في قلبنا
والدم يعزف علي الوتر
وبندعي دايما ربنا
وسط النهار أو في السهر
يارب لو كان ذنبنا
فالذنب عندك يغتفر
او كان بلاء بيضرنا
صبرناعلي حكم القدر
وارحم بلدنا وشعبنا
وارحمنا من ظلم البشر
ليست هناك تعليقات:
إرسال تعليق