خُطُوط للمُوت
وَطَني الحَبيب
دُمْتَ بِخَيْر
آَخِر رِسالَة بَعَتَّهَالَك مِن كِتير
كان قلبي نازِف مِ الأَلم ومِنِ الوَجَع
على حَال شَوارعِك والجَناين والحِيطان
وحَال جَوَامعِك والِّلي بِيْأَدي الآذان
يُومها ياوَطني قُولتلَك
الأرض بَطنَها فَتَّحِت
طَلَع الشِيطان بولادُه لَمَّا اتْمَرجَحِت
كُل المبادِئ والقِيَم
على إِيد رِمَم
بَاعوا العدالة وكل مَعنى لِلحَياة
رَمُوا فِ الزِّبالة كل شُريان للنَّجاة
سَاعِتها غَمَّضت العُيون
وقُولت أبداً إِيد ولادِي للأََمل مَاسْكَة عَلِيه
مُش راح تِضَيَّع فَرحِتي مُش راح تُخون
بَصِّيت فِ عِينَك بُصِّلِي
دَوَّرت وِشَّك يُومْها كَمِّلت الطَّريق
خَطوة بِخَطوة والطريق عَمَّال يِضيق
كَسَّر ضُلوعَك جُوَّه صِدرَك..... والهَوا
مَبقاش صَديق
عَطَّش فِ رُوحَك دَبِّلَك
باع الِّلي بَاقي ف أَوِّلَك
وبَقِيت ياوَطني
يادُوب خُطوط
مَزْرُوعَة مُوت
طَارِد ولادَك بَرَّه جَنَبَات الزمن
وبَقِينا إحنا الطَّيبين
مِن غير غَطَا مِن غِير سَكَن
حَتى الخُطا مِتْكَلْبِشَة
مِتْمَسْمَرَة ومِتْعَلَّقَة بالظُّلم
مِتْكَعبِلَة ف عَتَب المِحَن
أَمَّا أنا
مَبقاش ِف حِيلْتي غِير كلام
مِن غِير سَلام
عَمَّالَة اقُولُه وارَدِّدُه
ِيِمكِن ياوَطَني ف يُوم عِنيك تِقْدَر تِشُوف
يِمكن إِيدِيك رَغم الظُروف تِتْمَد لِي
يُحضُن جِناحَك الِّلي بَاقي مِنِّي فِيك
أنا بَشْتِريِك
بالعُمر والصَبر الِّلي فات
وبكُل آََت
أنا بَشْتريك
أَرجُوك ياوَطني ضُمِّني
#منى_عبد_الرحمن
ليست هناك تعليقات:
إرسال تعليق