مش دنيتي
لا الدنيا دي دنيتي
ولا الطريق سكّتي
يا غربه ما تحددي
شدّاني عندك ليه؟
وليه طريق الألم
مطرح ما اروح ب الاقيه ؟
د انا قلبي واللي فيه
مش حمل حزن جديد
ولا حمل جرح جديد
ولا قد لحظة هم
دمعي اللي أصبح يم
غرّقني جوايا
واتنتورت منّي
على فجأه دمعايه
طرفتلي عين الشوف
ومشيت شوارع بُكا
وانا فيها مش مألوف
وداريت سنين الخوف
وانا راضي بالمكتوب
لا الدنيا دي دنيتي
ولا الطريق سكّتي
لكنّي يا غربتي
صابر كما أيوب
وف كل يوم ينتهي
أرسم لبكره طريق
ويجيني بكره امشيه
يطلع طريق مقلوب
وغريبه بالقى غروب
رغم الشروق ما وصلش
يا دنيا ليه الغش
والزيف مغطّي الكل
ألمح شجر للفل
يطلع نبات صبّار
يا جنّه فيكي النار
طعمك مرار ف الحلق
نفسي الضلام يتشق
واخلص من الكوابيس
نفسي الطريق ينتهي
و أعدّي م المتاريس
نفسي أشوفني عريس
ف شوارع الأيام
لو حتى ..
بعد الموت
محمد ابو العبادى
ديوان هي دى الحياة
ليست هناك تعليقات:
إرسال تعليق