أنا توب قماش زهقان
مركون سنين علي الرف
عشمان يكون فستان
لعروسة يوم تتزف
و يغرقوه برفان
و يزهقوه أحضان
أنا توب قماش قلقان ليقولوا عنه بيشف
خايف قعادى يطول ع الرف ياما
و أشيط
أخسر دفى الألوان و اخسر معاه الصيت
و انشال من الڤتارين
و يرموني في الدكاكين
في الفرز أبقي اتنبن
مـركون بميل علي الحيط
و ينزلونى مزاد يخـدوه بتوع سجاد
في الكار ده لسه جُداد
و يعملونى شريط
أنا توب قماش مسكين
كان عشمه بيت في دلاب
فستان مع الفساتين
مـعملوله ألف حساب
له شنطة خاصه و شوز
بكعب عالي و بوز
و رف له محجوز
وله في شرحه كتاب
الشاعر عادل عوف
ليست هناك تعليقات:
إرسال تعليق