نروى العيدان
****************
همى بينا يا ام عيد
الفجر أذن
وابتدينا يوم جديد
الاذان خرم الودان
قومى يالا وصحى عيد
خلينا نروح نروى العيدان
هاتنشف م الحر الشديد
قومى يلا لسه نايمه
وانتى ال قبلى بتبقى قايمه
ايه جرا مالك كسيله
على أدى ما باليد حيله
السن عدى وبقت تقيله
اصبر شويه
مافيش دقيقه
هاجيب فطار جبنة قديمه
وعيش ملدن مآلى المشنه
وكام رغيف طرى وعجينه
خلاص ياحاجه مافيش سنان
كله اتخلع من زمان
ويلا نلحق العيدان
زمانها نشفت من زمان
ساعه وهايتزحم الميدان
يلا نخرج قبل الزحام
لو تسعي ونبطل كلام
هانوصل بسرعه واوام
وماتقلقيش هانيجى بدرى
كل مره تقول كده
وبنيجى واخرى
هو انتى بردوا مأيده
ايه ف خط سيرى
طب هاعمل ايه
كل الجيران بتيجى تجرى
لما من بعيد تشوفنى
عارفين ميعادى وامتى باجى
وامتى بوصل عندهم
واللى يقعد منهم
ما بيبقاش عاوز يقوم
واللى يحكى ع الهموم
واللى يجى يحكى حكايات
عن اللى جاى واللى فات
واللى عاش واللى مات
واللى محتاج قرشينات
وبثمن الغله يجوز بنات
واللى اتجوزت وجوزها مات
واللى تسمع منه الاهات
واللى فرحان بالانجازات
واحنا نسمع من سكات
ويمر الوقت ف حكايات
والغريبه قبل ما أجى
كأنهم عارفين معادى
والمكنه تسقى الأرض الشراقى
وتجرى الميه فى المسقه
ونشرب فى مظلة الشجره
شاى ع الدخان وع الراكيه
لحد ما بنسقى العيدان
ونسمع للمغرب أذان
ساعتها بنسيب المكان
ونوصل البيت بعد الأدان
مافيش غير مره اتأخرنا فيها
فاكراها ياتارا ولانسيتيها
فاكره يوم ما خدنا الكلام
وسمعنا صوت بيرمى السلام
فاكراه كان ساعتها جارنا سعد
وكان ماشى على طول الحد
وسلم عليك يد بيد
لما سألنا ع الجيران
والفلاحين أيام زمان
قلناله كل حاجه اتغيرت
واتبدلت واتمردت
والفلاحين اتمدنت
سابوا الفلاحه وسابوا الزراعه
والكل هج ع الصناعه
ف الزراعه شافوا المهانه
وقالوا الصناعه أم الوجاهه
ومايعرفوش أن النزاهة
اصلها كانت الزراعه
م/محمد بدوى أبوالعلا
ليست هناك تعليقات:
إرسال تعليق