شيماء
******
شيماء
كات لما بتزعل
تدارى ف ستارة الليل
وتميل
على كاس الصبراللى مصبر
كام قلب عليل
من غير ما تقول
أو تِبعت
م الشوق مراسيل
وتصُر الدمع اللى بينزف
من نن العين
ف الشال الحيله اللى بيستر
ست الحلوين
وتقول للناى
لو همك همى
وبتحلم بالصبح الجاى
إعزف مواويل
للفجر الطارح أنوار
وبشاير طرح الأفراح
وكفايه نواح
على ماضى وراح
لو همك همى
ما تقولش السر اللى آمنتك
بدموعى عليه
لحبيب القلب اللى خانتنى
ف الغربه عينيه
ما تقولش أنا ليه
بتخبى
م الويل ... ف الليل
شيماء
كات لغز محير كل العشاق
لو حبت توصف مشاعرها
وتفك جدايل ضفايرها
تركب مراجيح
وتوشوش بعيونها الريح
وجمال النيل
وان حبت ترقص وتغنى
تتحزم
بالشمس الطاله من خرم الشيش
وتطبل
على جرح القلب اللى بيحلم
بالحب يعيش
شيماء
كات لما بتضحك بتشوفها
ف الليل... قنديل
*******************
رضا أبو الغيط
ليست هناك تعليقات:
إرسال تعليق