أنا بين حروفك يا زمن تايه
أيام بتجري ع الطريق م الخوف
الليل سواده ف السما عايش
و الصبح هاجر.. أصله وش كسوف
ما بقيتش عارف سكتي على فين
و لا مين حبيبي و سط ناس ياما
فنسيت اصاحب روحي و اسألها
و التوهة راسمة فرقة هدامة
يا سنيني مالك ٠٠٠ ليه كرهتيني
و انا ليكي فارد بالرضا قلوعي
باروي خضارك حتى من دمي
و ان شح دمى يبقى بدموعي
خفي سياطك مرة و استنى
او حاولي نوبة تسمعي صوتي
ما انا فيكي عايش بس باتمني
اتاريكي قاصدة بالوجع موتى
يا سنين كفاية و خفي م التوهة
و تعالي جنبي و ابقى مش جارحة
انا وعد مني مش هاقول كارهك
و ان ايدي طالت هابدرك فرحة
ليست هناك تعليقات:
إرسال تعليق