(الحضانة)
واتولدنا في الحضانه
وانكتبنا جوه خانه
قالو لسه الواد صغير
حطو جنبه كام علامه
وابعدوه عن صدر امه
رضعوه من الاجزاخانه
وارسمو جواها طريقنا
قبل ما يحس بندامة
لما يجي و يفارقنا
يبقي يمشي بالسلامه
حفظوني في الحروف
قعدو يملو القلب خوف
خوفوني من الكلام
و الضمير خلوه ينام
اوعي يطلعلك لسان
عيش حياتك فيلسوف
لو تعيش خليك جبان
بالعجين سد الودان
و بعنيك اياك تشوف
واهتف لنا وبأسمنا
اياك تخالف حكمنا
داللي يلف في دربنا
لازم يطوف
هنعيشك عيشة تمام
ونزغطك زي الحمام
وان يوم كبرت نقصصك
ونطيرك حسب الظروف
طول ما انت طالب ودنا
وتحبنا
هندلعك من غير كسوف
ونلبسك احسن قماش
والبدلة تبقي خيوطها صوف
وان يوم شيطانك يخدعك
يضحك عليك و يوقعك
هنربطك زي الخروف
**********************
جنب مني في الحضانه
ناس ..........كتير
اللي ياكل بالقديمة
واللي يحلم بالفطير
واللي عايش بس ميت
واللي بيحاول يطير
واللي عامل نفسه عمدة
يمشي جنبه كام غفير
يحرسوها من ايدينا
يحرمونا من الشعير
ياكلو ويمنو علينا
يحبسونا جوه بير
لما حاولو يعلمونا
ركبونا علي الحمير
والحصان حتة حلاوة
والعروسة للأمير
لو يلاقو الدم فينا
يشربوه زي العصير
*****************
الحضانة زي غابة
يقتلو فيها الفقير
يعدمو فيها الغلابه
والديابة تعيش كتير
علمونا كل حاجه
زرعو جوانا البلاده
خلو لينا العيشة سادة
والعويل خلوه مدير
علمونا الكفر بيكي
قطعو بايدهم ايديكي
منعو فيكي اي خير
حفظونا وعلمونا
بيتونا علي الحصير
رغم كل الضرب فينا
نسيو يومها يعلمونا
يبقي جوانا الضمير
يبقي جوانا الضمير
ليست هناك تعليقات:
إرسال تعليق