الدنيا جميلَه وحلوَه كمان
إيه غيَّر حالها وتفاصيلها
َتِشبِه لعروسَه ف الفُستان
فرحانَه وفاردَه ضفايرها
وسألت عليها لقيت رمضان
بيجيها يداوي جراح العام
وبيروي صدورنا بالقُرءان
فـ قلوبنا تغِير وتغنيلها
والفرحَه نعيشها تَلاتين يُوم
بين طاعَه ولمَّه وعبادَه
وندعي يا رب قبول الصوم
مـ الحسنه بعشرَه وزيادَه
وبيوت رحمن مليانَه عباد
وإيمان جِوَّاها يكفي بلاد
أرواح بتنافس ع الحسنات
وبتدعي مـ يقطع لها عادَه
سُبحانُه رحيم بينا وعالم
بيعنَّا علىٰ قيامه وصُومُه
والقلب تملِّي فيه هايم
ولا فرحه بتوازي قُدومُه
معذُوره الدُنيا ف مشاعرها
لما ابو صيام بيرُدِّلها
ونشوفها ف صورَه ما أجملها
ونقول ولا أجمل من يُومُه
وقلوبنا تحن وتشتاق ليه
والأهل جميعا يشتاقوا
ويقولوا ولا اجمَل من لياليه
مـ صلات أرحامنا بيتلاقوا
حقيقي بيبقىٰ الكل جميل
أخلاقنا حاضِنها شهر فضيل
والحب ما بينَّا بيبقىٰ سَفير
وبنقبل أسف اللي أَسَاءُوا
ليست هناك تعليقات:
إرسال تعليق