داخل حدود الوطن
ياعقل ليه غفلان
تملّي غاوى الفتن
جاهل بدور قبطان
داخل حدود الوطن
الحمل زاد أوزان
الحلم شُغله وسكن
أو زرعه تملا غيطان
داخل حدود الوطن
قُولي مالوش عازه
مهما تزيد المِحن
العقل في اجازه
داخل حدود الوطن
ممنوع تكون راعي
العدل بينا اندفن
والحق بدراعي
داخل حدود الوطن
مزروع كتير كوسه
الارض صابها العفن
والزرع فيه سوسه
داخل حدود الوطن
العُرف أصبح غش
خربان ياكل المكن
الحلو أصبح مش
داخل حدود الوطن
الأخ ضد أخوه
ماسك فى إيدُه الكفن
فرحان عشان قتلوه
ليست هناك تعليقات:
إرسال تعليق