من صُغرك
وانت بتتحدى
جيش الملاعين
وف عقلك
مرسومه خريطه
وعليها م العُمر سنين
ومعاهد ربك تستحمل
أنياب الناس الخاينين
وتحرر بالصبر الغالي
أحلام العقل المسكين
بتنادي بالصوت العالي
علي امه
من ناس نايمين
وضميرهم تايه ف عرينهم
وجبينهم فوق منه الطين
من صُغرك
وانت بتتحدي
ف تعالب بتقسم لحمك
وتفرق منه ف مواعين
بتفرق ف الخير الطارح
ف مطارح
أرض الصالحين
والقلب ما شايف ف الغربه
غير تُربه
مدفونه فيها المساجين
وف ايدك م الحق مخالب
بتمزق جُبن التعابين
وتحارب مكر الشياطين
وحجاره شايلها أيادي
بتنادي ..هنروح على فين
ودموعك كات ع اللي استشهد
بتكحل عين الصابرين
وتطهر قلب الساجدين
وتطمن ف القلب العايش
ع الهامش
ودموعه أنين
من صغرك وانت بتتحدى
كل اللى بيكتم أنفاسك
وبينحل وبرة إحساسك
من غير ما تلين
**********************
رضا أبو الغيط
ليست هناك تعليقات:
إرسال تعليق