بحبك
*********
بحبك
وعاشق كل من حبك
وبحلم بكره نتقابل
وأعيش
عمرى اللي جاي جنبك
وبتمني أكون ليكي
شعاع الضي لعينيكي
وارسملك تفاصيلي
بلون الفرح فوق خدك
واكون القمح ف غيطانك
واغصاني تشيل حَبك
واكتب لك بلون دمي
حروف اسمي مع إسمك
علي شط الغرام بينا
وما بينا يكون صبرك
ياأم الدنيا..... يا أمي
أنا ابنك..... انا نبضك
ونبض القلب بيغنى
ويتمايل.....مع همسك
انا الفارس وأنا الحارس
أنا سلاحك ...وأنا جندك
هااضحى ..يا امه علشانك
وهااقتل ...فيكى سجانك
واحزانك هااحطمها.......
وألضمها
مسابح فرح فوق أرضك
أنا المسلم وأنا القبطى
أنا المؤمن
بإنجيلك وقرآنك
بصلى الجمعه ف الأزهر
ويوم الحد ف العذرا
بندعي المولي ينصرنا
وبعيونا نصون عرضك
يا ام الدنيا يا أمي
أنا فرحك.... وقنديلك
وغنوه شوق مواويلك
ولو يا امه تنادي لى
ف عز الشده أنا أجيلك
واكون جنبك واكون سندك
م انا ابنك
ودُقت الشهد من نيلك
ولحم كتافي من خيرك
ونبض القلب من نبضك
أَنا المفطوم على نيلك
ولحم كتافي من خيرك
وجنبي ....حن لترابك
ونور شمعة ...قناديلك
انا ابنك ..انا منك
وسن تاريخي من سنك
يا ساقيه دايره مش همك
سهام الغدر من ليلك
بنام وأصحي علي حبك
ومتربي علي حجرك
فمين غيري يشيل همك
ومين غيري يغني لك
سباط نخلك طرح تمرك
وعمر الدنيا من عمرك
وانا طارح عشان خاطرك
ومن طرحي راح أهديلك
شباب حالف يصون عرضك
ويحمي الشبر من ارضك
يا صبره وصبرى من صبرك
تنادينى أنا أجيلك
أشيل عنك هموم ياما
وأحارب أي دوامه
واجوز سلمي لسلامه
وأغني لهم وأغنى لك
********************
رضا أبو الغيط
ليست هناك تعليقات:
إرسال تعليق