معادلة .. !!!
بقيت احلم ...
واقوم م النوم أكون ناسي
واخاف م الموت وانا عاصي
وبتجيني كآبة وحزن
وباستغربني بعض ساعات
وقلبي احتار يفهِّمني
وعقلي بفكره وترني
وحتى الصورة ف مرايتي
ماتشبهنيش .. !!!
ولسه ف حلمي متشعلق
أغمض عيني ومبرق
ونوم مايجيش
أقيد النور ...
واجيب قلمي وكراسي
يتوه الحرف يخذلني
يفشِّلني
وحتى ان جاد بقطارة
يقولي اصبر
وهات بالطُعم سنارة
وبلاش تتعجل المواضيع
ماهوش تسميع .. !!!
ومعاني سابقة التجهيز
ومش براويز
تضمن فيها أشعارك
ماياما كتبت
وإيه حققت .. !!!
جمع كل أوراقك
سنين ضيعت
لأ وتمللي تتفاخر بأفكارك
ومخبي لبعض أسرارك
وإيه يفرق ..!!؟؟
ولسه مازلت ع المفرق
لا بتعدي ولا بترجع
وعايش صورة بالأوهام
لعقلك بس وبتسمع
ورافض تعدل الخطوة
ولو زقة
تكون قدام
بحجةفكر بقى بالي
وبتغالي ...
وتشطح برا ع المنطق
وتتعصب لناس تابت
وندمت ع اللي كان منها
ورسِّمها إمارة بزيف
وكان تخريف
بدعوى حداثة أو تطوير
لفكرة أو لفكر الغير .. !!!
خطوط للسير بتتكرر
شخوص وأداة بتتغير
خبير مارونيت ...
يحركها
يفنطها
يورطها
ومتداري ف خلف ستار
بلاش أعذار .. !!!
ماعدش العمر فيه باقي
وقد ماراح
تعيد للماضي أو تندار
إمسك ف الفرصة واكسبها
معادلة وسهل تحسبها
وليها أساس
دي راحة القلب
ف الإحساس .. !!!
بقلمي أحمد أبو عاصم
ليست هناك تعليقات:
إرسال تعليق