(من الحياة )
------------
ح تروح علي فين ؟
-------------------
شايفاك بتلم حاجاتك
علي فين ح تروح وتسيبني
منا حاجة ضمن حاجاتك
وازاي هنت عليك يابني؟
بعد الأيام مانهتني
مابقاش إلا قليل فيها
والأصعب جاي ح يصيبني
راح اقضّي ازاي لياليها
مش راح اقوللك ربيتك
ولا شهد حناني سقيتك
ولا شلتك جوه حشايا
ورعيتك رغم أسايا
ولا ابوك مات بدري وسابني
وانت جنين لسه ف بطني
وانا عشت العمر عشانك
وجعلت القلب مكانك
مش باطلب منك حاجة
ولا لوصايتك محتاجة
الأصعب إني أشوفك
راح تبعد ويا عيالك
وانا طول عمري داعيالك
تبقي قريِّب من عيني
وتعينّي ف صعب سنيني
وتكون سندي ومُعيني
ومادام راح ترضي مراتك
وتعيشوا ف حضن حماتك
إديها حياتك إدّي
لكن مهما ح تديها
عمرها ماتحبك قدي
لا انا قلت لحد اسقيني
ولا عايزة يابني اديني
ربنا وحده بيرضيني
ومعاشي ومكفيني
لكن بُعدك يضنيني
يا ضنايا ياحبة عيني
وعشان ما كبرت خلاص
راح فين يابني الإحساس ؟
تسيبوتي لوحدي أعاني
مافضلش كتير ف زماني
والعمر طويل قدامكم
ربي يطوِّل أعماركم
ربنا وصاكوا عليه
والدم مايبقاش ميه
وان كنت انا هنت عليكم
عمركوا ما تهونوا عليّه
واهو بكره حيكبر سنِّك
تحتاج بنتك أو ابنك
تلاقيهم راحوا لحالهم
وح تصبر غصبٍ عنك
.........................
للشاعرة / سامية سليمان
ليست هناك تعليقات:
إرسال تعليق