مش كل كلام حلو بيتقال
بيكون ف حقيقته امانى صفا
و لا كل عناق مليان اشواق
يتترجم حضن و يبقى دفا
ما كتير احضان بتدارى كلام
و خناجر جاهزة تقطع فيك
نظرات بالعين .. قاسيين .. لايمين
و قلوب خاينين و بيدعو عليك
الدنيا خلاص .. بقى فيها رصاص
مطلوق حواليك و ساعات بيصيب
فبلاش تتطمن بالاحساس
انك ف الناس مش حد غريب
فى الآخر .. خاف .. لمس الأكتاف
لما بتتشاف و يقولو دا فاق
اكتبها حروف .. او قول دى ظروف
و بعينك طوف .. و اقرا الاحداق
هتلاقى عيون ... جاحدة و بتخون
و عليها تهون .. كل الاشياء
ناسية و بتبيع وصفاك ب وضيع
و تقول دا جميع افعاله رياء
سيبها على الله ... خليك وياه
ما تقولش الاه عند المخاليق
ربك دا كريم ... طول ما انت سليم
و لأنه رحيم ... هيفك الضيق
ايام ف سكوت ... خليها تفوت
رب الملكوت ... بيحب الخير
و افضل جواك .. حد بيهواك
و استنى معاك ... حبك بضمير
....................................
للشاعر / م. فهمي علي نصر
ليست هناك تعليقات:
إرسال تعليق