يا ساعات الشوق المتحنى
بوجع و سكوت
يا أنين كان بايت مستنى
ايام بتفوت
ما تسيبش عنيك تحرم قلبى
من انه يشوف
و يسافر ف فضاك العاشق
يهرب م الخوف
و لا تجرح احساسى بانك
جواك احساس
و تملى على ودك ضحكة
بتراضى الناس
يا ساعات الشوق المتحنى
جوايا حنين
و ف بحر اللهفة انا و قلبى
ف الموج تايهين
لو وصلنا لشط عشان نفرح
و لا بالنا ارتاح
و عمايلك بتعذب فينا
ما لقينا براح
ليلك بيطول و نهارك
ما بقاش هواه
بيزيدو المنا اللى كلامه
مفيهوش غير اه
يا ساعات الشوق المتحنى
الاخر فين
و العشق المتقسم بينا
المروى انين
هيطول و يسيبنا ننادى
على صبح ما جاش
و هيفضل كدا بس لامتى
و امتى هيتعاش
احلام القلب المسجونة
جوانا كتير
و اكيد باينالك ف الصورة
بتقول و تشير
على بكره الجاى بعد معاده
و يجوز ما يجيش
بسنين بتعدى و نستنى
و اخرنا ... مفيش
.................................
للشاعر / فهمي علي نصر
ليست هناك تعليقات:
إرسال تعليق