أنا المصري
_________
أنا الحارس على حدودك
أنا السهران على وجودك
أنا كرمك،أنا جودك
أنا ما تهزنى الأهوال
أنا اللى العمر ما نسيتك
أنا أرض وحيطان بيتك
أنا الزرعة اللى فى غيطك
أنا فأسك وانا السندال
أنا العامل على نولك
وفوق ضهرى هنا حمولك
أنا نايك وارغولك
أنا بيرم وأنا متقال
أنا الغنوة اللى فى لسانك
ومين ح يغنى علشانك
ومين حبك ومين شالك
ومين عشقك ومين ميّال
أنا الحِنّة اللى فى كفوفك
أنا النغم اللى فى حروفك
أنا نبضك وأنا شوفك
وانا الراوى اللى قال موّال
انا العشق اللى بات سهران
انا العاشق وأنا الولهان
ولو وصفونى يوم بجنان
ح اقول فرسي وأنا الخيّال
كتير ح يقولوا مجنونك
ومين غيرى اللى حيصونك
عشان خاطرك ولعيونك
أشيل الميّة بالغربال
دانا عاشقك ومحبوبك
وانا الورده اللى فى توبك
وأنا بختك ومكتوبك
وانا الرّنة اللى فى الخلخال
انا الحاضر وأنا الماضى
وأنا العاشق ومش راضى
أعيش العمر ع الفاضى
ولو حتى اعيش شيّال
واجيبلك م القمر كردان
واجيبلك م الأمل بستان
وارسم لوحه بالألوان
بطولك حتى للشلال
يا بلدى يا حلوه يا عفّيه
يا أجمل ورده ونَدّيِه
يا أحلى صورة فى عينيا
يا ساكنه جوه ننى البال
ليست هناك تعليقات:
إرسال تعليق