بره التغطية
انا بيني وبيني ٢٠٠ عاركة
وحاجات على نفسي بتتكا
انا بره حدود التغطية
انا فيلم دراما بدون حبكة
.....
انا حد معايا ومش مني
انا كل الناس التاعبيني
انا جرح بينزف ف مواجع
ودموع بتحايل ف النني
.........
انا كلي مشاكل وكآبة
وحياتي اتقلبت لرتابة
انا حد معقد نفسيا
على نفسه تملي بيتغابى
......
وبروح على حاجة مهيش ليا
وبدوق من روحي التحلية
وبشوفني ساعات انسان عاجز
و فقدت شروط الاهلية
..........
احلامي اتقلبت ف الترعة
انا طفل وخايف م الولعة
انا زي ما اكون واحد مدمن
بيبهدل نفسه عشان جُرعة
..........
وف عز حضوري بكون غايب
ف ربيع العمر بقيت شايب
انا كل مافرحة بتتوزع
بلقاني مخادتش ولا نايب
......
انا حاسس إني بقيت غيري
وفقدت نفوذي وتأثيري
انا قلبي برغم انه مذاكر
قام ساقط شفوي وتحريري
.....
انا بنده ليا ومش سامع
وسنيني رميتها قصاد جامع
انا كل الناس فيا بتطرح
وانا ليهم دايما اكون جامع
.........
محطوط على قلبي المتاريس
مع اني ماكنتش عتريس
ولا عمري ف مرة اترشحت
اني ابقى محافظ ورئيس
........
بستأذن منكم تسيبوني
مش عايز ورد وبمبوني
انا عايز اخرج من توبكم
علشانكوا بجد تعبتوني
ليست هناك تعليقات:
إرسال تعليق