قالو عصايه الفقي
يا ولدي م الجنه
حافظ كتاب ربنا
والفرض والسنه
قاعدين صفوف حواليه
شيخنا يعلمنا
آيات كتاب ربنا
نقرا ويسمعنا
يقرا ونسمع آيات
بيها القليب يسعد
قوم اقرا سمعنا
حفظ اخوك مسعد
يحكي لنا ع الهادي
طه النبي احمد
ودراعه متشمره
والفلكه متحضره
والقمشه وعصايته
للي في يوم يجحد
شيخنا يدارسنا
يقعد يجالسنا
يجعل عقولنا مناره
وشيخنا ريسنا
شيخنا في غايه الأدب
منه القلوب تترعب
منه وغايه الأرب
نقيد فوانيسنا
نكتب كمان ع اللوح
يبقي القليب مشروح
ببوصه متوضبه
منها المداد بيفوح
واللي ما يوم حافظ
واللي ما يوم كاتب
شيخنا يمد الجدع
دوغري يقوم حافظ
يا محلا كتابه
وقرايته وحسابه
واللي يكون حافظ
يبقي من احبابه
يطلق علينا بخور
ييجي علينا الدور
وينادي ابو مندور
الفلكه تتجهز
والقمشه تتهزز
واللي يكون جهبذ
وحافظ المسطور
نقرا كتاب ربنا
نسعد ونتهني
وننول ما نتمني
ده عصايه فقينا ياخال
حته م الجنه
بقلمي يحيي ابراهيم
الصوره للفنان محسن ابو العزم
ليست هناك تعليقات:
إرسال تعليق