عيشة عفريت
أنا ليه بافتكرك ف همومي؟
مع إن الصعب تعالجيني
وماحدش أبدا في الدنيا
يشرب م السم عشان ما يعيش
ولاحد في يوم حضن الاشواك
لاجل إنه ينام الليل مرتاح
وغيابك رغم إنه جرحني
أدمنت الجرح وحبيته
خبيت إحساسي وحطيته
في نزيف الجرح اللي حواكي
اتجلط دمي وبواقيكي
نشفت ع الجلد
ورميت القشرة وموضوعك
مابقاش له مكان
والسيرة إن كانت يوم عنك
الناس حساني ما بعرفكيش
وكأننا فكرة ليل ونهار
الضلمة بتزعل وتقاسي
وتموت لو أي شعاع يهجم
من أول شمس الكون للشمع
كفيت النظرة اللي تبكي
مش عايز نور
و أنا قط باحبك خنقاني
مش حابب مشنقة أو جاني
فلفصت ببدني باقول كارهك
من يومها وكل اللي قابلته
فيه حاجة تحضر عفريتك
القالي معاها كلام بحدود
تعشقني عشان إن أنا راسي
عاقل مش زي بقيت الناس
وأحاول بيها إني أنساكي
ألقاني بحاول أطبعها
نسخة بكربون منك إنتي
وأسيبها مهاجر مقاسيكي
وألوم الطيف اللي عماني
عن عشق عيون بعد عنيكي
ليست هناك تعليقات:
إرسال تعليق