ادفن أحزانك ف اليم
واتلم
وبلاش تتحايل ع العالم
د العالم أصم
وان كان ولابد تقول حاجة
فبلاش م النفس المحتاجة
تفضل ف الغم
خليك ف الركن اللى ف دارك
ولنفسك سرسب أسرارك
يمكن تهتم
تبنى لك مركب وشراع
وتعدى بحور الأوجاع
ويروق الدم
لا هيمسح خدك غير كفك
ولا يرضى بشوكك غير خُفك
ف سنين الهم
انسى اللى جرالك م الدنيا
وبلاش أحزان
وبلاش تتحزم... بهمومك
وتقول .. لو كان
أصل المكتوب لك هتشوفه
بالكيف والكم
وسنين الحزن المرسومة
ف كتاب معلوم
م الصعب تفوتك تستمتع
بجمال اليوم
ولا سهل عليها تسيب قلبك
ولا حتى الدم
اهتم بنفسك ....وارعاها
من غير ما تلوم
على سوء الحظ المضفر
بعذاب وهموم
وبلاش تستلم لألامك
ولا حتى النوم
ومسيره الهم المتنطور
م الخوف يتلم
ليست هناك تعليقات:
إرسال تعليق