أجمل ملاك
............
من يوم م شفتك
و انت عمرك مريلة
و فيونكة لسه منقطة
حبات أمل
مربوطة علي خصلة حرير
بتداعب الايام دول
لسه البراءة
و الشقاوة
و الدلع
أنهار مبتبطلش فيض
مر الزمن
و كأنه واقف مترحه
بطل يدور
و أماكن الذكري بتقع
يوم بعد يوم
لكن انت لسه السوسنة مبتدبليش
لو مر من بين السنين
مليون سنة
لساكي واقفة بتحدفي
للشمس سنه مسمسمة
من طعمك اللي ف سكره
غزل البنات
انا كل م أحلم بالبنات
القاكي إنت ف وسطهم
أجمل ملاك
عمرك بطول العمر كان
لحظة ثبات
لحظة ما اطُل ف نن عينك اكتشف
إني الامل
متغطي برموشك حرير
راح يعمل إيه الزمهرير
و قت اللقي و الانصهار
يا بنت حلمي اللي ابتدا
من K G 2
لا بينتهي حتى ب ليسانس
ولا حتي بنهاية المعاش
ولا حتي واحنا ف ارزله
من يوم مشفتك
و الحياة بتغني بمبي
و الدنيا فكا وسطها
متحزمه و ضرباها Dance
و أنا و أنت زي جوزين حمام
فوق الخيال بيبرجموا
كان حلمنا فوق الشجر
لو حتي عش
جواه زغب مفروش بقش
وغطاه رضا و مفهش غش
ولا وش لابس فوق ملامحه
ألف وش
ولا وش لابس ماسك
بيداري الحُفر
حُبك يابنت الايه ح?فر
ف القلب نهر من العسل
ف الروح سكن جوا البدن
كان م المحال يظهر ملل
ومفيش محال لو تفضلي
كدا بشريطين
و فيونكة فوق شعر اشتعل
فيه الوقار
و قلوبنا لسه ف عزها
بتشد ف ستارة النهار
تكشف لنا بدايه الطريق
و بتنتظر دايما أمل
راكب علي ضهر الجمل
و زمانه جاي
بيجدد الوعد القديم
و نلبس العمر اللي جاي
بادينا من تاني الدبل
الشاعر/
أبوالخير بدر
ليست هناك تعليقات:
إرسال تعليق