ورد المحبة
ورد المحبة نشف
من قلة الميه
وسقيته من دمعتى
وفرشتله ايديه
حبيبى من قسوته
سابنى ووحدانى
أعد نجم الليل
فيقولى من تانى
حبيبى اجمل مافيه
ضحكته الحلوه
لو قال كلام عادى
احسبه غنوه
حبيبى لو عدى
اعرف اوام ريحته
وابص م الشباك
القاه ماشى تحته
حبيبى صوته
زقزقة عصافير
وكل ماجى امسكه
القاه اوام بيطير
بيعدى يرمى السلام
ويسيبنى للتفكير
ورد المحبه نشف
من قلة الميه
فسقيته من دمعتى
وفرشت له ايديا
حبيبى ماله كدا
فايت وناسينى
سابنى فى عز الهوى
مارضيش يداوينى
مع انه هو الوحيد
من نظره يحيينى
حبيبى أصله عنيد
فى العشق ماله مثيل
ان كنت انا القنديل
فهو ليا فتيل
حبيبى مهما عمل
فيا انا مسامح
لو فاتنى يوم او نسى
راح اعيش على امبارح
حبيبى عدا ولا سلم
انا قولت ماله كدا
ساكت مابتكلم
مايكونش ياد م الهوى
حيران وبيتألم
ماهو برضه كاس الغرام
فيه الوجع مقسوم
مش كل قلب ابتسم
يبقى ما فيهش هموم
لو دق قلبك هوى
افتح وخش وعوم
يا تموت فى لحظة طيش
يا تكمل الالبوم
اشرف الشناوى
ليست هناك تعليقات:
إرسال تعليق