أنا لسه بفكر فيكي
مش عارف لحظه انساكي
ولا عارف اكون من غيرك
ولا اكمل حتي معاكي
الحال عمال بيسوء
و البال مشغول مش فاضي
و حنيني ده توب مشقوق
و الشوق ابدا مش راضي
يوميا يزغد فيا
يلطشني أضحك و أكابر
أطوح منه وليا
اعمل علي روحي مسافر
قال يعني مانيش مهتم
ولا فارق كيف ولا كم
يصرخ قلبي ما تتلم
ولا انت هتطلع فيها
الشاهد أني بحاول
اتغير و ما نيش عارف
واللي بطاوعني في قربك
بـ يعند لو غيبتي وخالف
وانا حالف رغم هزيمتي
افضل علي رجلي بقيمتى
ماتهزش يوم ولا أطاطي
لا لواطي
ولا لعزاز
في كرامة بخام مطاطي
وكرامتي بواجهة إزاز
شفاف كامل والرؤيا
واضحة ومن غير مجهود
وفي اي علاقه بخوضها
مابحبش اي مجاز
فـ إن جاز ليا ومسموح لي
قبل ما هتجيني تروح لي
تقعدي ويايا بطولى
وانا كل اللي هقولى
أنا لسه بفكر فيكي
مش عارف لحظه انساكي
ولا عارف افاجئك بيا
ولا اكون لك حتي ملاذ
فطبيعي تشوفي وجودي
مغرور .
ومعدي حدودي
الحب في شنطة أيدي
والشوق ماسكه بقفاز
ليست هناك تعليقات:
إرسال تعليق