مفيش وقوع
مفيش وقوع ومفيش ركوع ومفيش ألم
منتا اللي واخد ع الوقوف
وانت اللي رافع 100 علم
وانت اللي ف عز الهوان كنت القوي
وانت اللي شايل م القاموس كلمة ندم!
..........
وانت اللي باني لمركبك كل الشطوط
وانت اللي فايز بالهدف لما تشوط
والضحكة انت سحرها على كل خد
وانت اللي واضع للامل بند و شروط
...........
ايه يعني لما الدنيا تقلب وشها؟
والفرصة تنزل من كراسي عرشها؟
والهمّة تضعف او تدوق طعم المرض
واليأس لو داب ف الاماني وغشّها!
..........
وان كنت فاكر ان حلمك راح بلاش
من امتى راح الفجر ف ميعاده ومجاش
مش برضو بعد الطلق بيكون الميلاد؟
ولولا غزل القطن مايكون القماش؟!
.............
والدنيا دي زي السواقي والدولاب
فمرة تحت رجلها ومرتين فوق السحاب
وفي حاجات مش هتمشي برغبتك
واكبر خسايرك لو نويت ع الانسحاب!
سميرمحمود
ليست هناك تعليقات:
إرسال تعليق